Архивы рубрики: Haberlär

Ayıklıklan kutlayalım yortuyu

Akılımda kalêrlar laflar manastırımızın ilk igumeni boba İonadan, angısı sora mitropolit İona oldu. İșittim o lafları çoktan, açan ilk kerä geldim Ayoz İoan Maksimoviç adına manastıra, monah olayım deyni. Açan yaklașardı bir yortu, boba İona hep deyärdi bir iș, sansın refren.  Hep sölärdi bizä: “Ayıklıklan kutlayınız yortuyu”.  Elbetki, bän annardım onun laflarını, ama zorlan üürendim sesleyim.  Yavaș-yavaș üürendim yapmaa ölä, nicä o söledi.  Bilersin mi neçin? – zerä kolay-kolaydır tutmaa orucu, ama ayıklıklan kutlamaa yortuyu – lääzım çok kușkuluk. » Читать далее

«Hakikatın sesi» Komratta tanıdıldı

8Büük ayın 15-dä P. Draganov adına Komrat regional bibliotekasında bizim gazetamızın prezentaţiyası geçti. Prezentaţiyada pay aldılar Gagauz Respublikasının ilk prezidenti Stepan Topal, Gagauziya M.Maruneviç adına Bilim-aaraştırma merkezinin direktoru Petri Paşalı, Saabinin Simasının Diişilmesi adına klisenin cümnä başı ierey Sergi Kopuşçu, gazetanın izmetçileri, Bilim merkezinin aaraştırmacıları, cümnä zanaatçıları, gagauz dilini sevennär.

Gazetayı  başladı tiparlamaa 2014 yılda kultura–aydınnatmak cümnä topluluu – “Aydınnık”. Nicä bileriz, bu gazeta gagauz dilindä tiparlanan ilk gazeta, misioner yapraa gibi, yayınnanardı 1907-1938 yıllarda.

» Читать далее

2016-cı yılda Çakirlerin yıldönümneri

 Çakir soyu ölä büük hem bereketli bir aaç, angısının kökleri çekiler taa XVIII asirdän soy başı Yançu Çorbacıogludan, angısını hırsızlar öldürdülär, derisini da soydular. XIX hem XX asirin çeketmesindä Besarabiyada izmet etti 50 kişidän zeedä, kim çıktı bu ayledän. Popazlar, diakonnar, daskallar, zaabitlär, monahlar h.b. 2016-cı yıl kimisi için yıldönümü olacek, unutmayalım onnarı anmaa, hem en önemnisi — onnar için dua etmää.

  • 265 yıl Jelez Çakirin duumasından. Yançu Çorbacıoglunun oolu, duudu Şabla küüyündä (Dobruca, Bulgariya).
  • 220 yıl popaz Vasili Çakirin (Jelezin oolu) duumasından.
  • 195 yıl popaz Nikolay Çakirin (Zaharinin oolu) duumasından.
  • 185 yıl daskal Mihail Çakirin (Vasilinin oolu) duumasından.
  • 155 yıl protoierey Mihail Çakirin (Mihailın oolu) duumasından.
  • 155 yıl popaz Nikolay Çakirin (Georginin oolu) duumasından.
  • 140 yıl shimonah İrinarh ın (dünnedä İoan Çakir, Zaharinin oolu) geçinmesindän.
  • 140 yıl yazıcı Mihail Çakirin (Mihailın oolu) duumasından.
  • 125 yıl diakon Feodor Çakirin (Georginin oolu) geçinmesindän.
  • 100 yıl protoierey Dimitri Çakirin (Georginin oolu) geçinmesindän.
  • 105 yıl “Eski Baalantının ayozlu istoriyası” kiyadının tiparlanmasından. Bu kiyadı, yannış olarak, sayardılar 1907-ci yılda çıkan ilk gagauz kiyadı. Çevirdi prot. M. Çakir.
  • 80 yıl “Psaltir” kiyadının tiparlanmasından. Çevirdi prot. M. Çakir.

Viktor KOPUŞÇU,

Hakikatın sesi, № 11 (14), s. 1.

«Dua kiyadı uşaklara deyni» ikinci kerä tiparlandı

2015 yılın canavar ayında “Aydınnık” kultura-aydınnatmak cümnä topluluu “Dua kiyadı uşaklara deyni” kiyatçıın ikinci basımını tiparladı. 2000 taynalık tirajlan çıkan kiyatçık Komratta hem Kurçuda (Ukraina) tanıdıldı. Gagauziyanın hem Ukraina gagauzlarının birinci klas üürenicileri “Aydınnık”tan birär kiyat baaşış kablettilär. 2012 yılda çıkan kiyat pek lääzımnı oldu, onun için kararlandı tiparlamaa ikinci basımını. İleri dooru, lääzım olarsa, ek tiraj yapılacek, haberledi “Aydınnık” CT. » Читать далее

«Aydınnık» CT iki yaşını kutlêêr

Viktor, artık iki yıl oldu, nicä ofiţial olarak işleer “Aydınnık”. Söläyin, kaç kişi bü- ünkü gündä girer bu cümnä topluluuna, hem nasıl dinamika var azalık proţesindä?

Birkaç yıl geeri, açan bizim aklımıza geldi çekettirmää bölä bir iş, biz toplandık birkaç kişi, hazırladık dokumentleri da registraţiyayı geçtik. Az kişi başladık, az kişi dä ötää dooru ilerlettik bu işi. Büün yaklaşık on kişi var “Aydınnık” cümnä topluluunda, hem dä var onnar, kim diil aza, ama savaşêrlar bizä yardım etmää. Bizim neetimiz diil, ani çok kişi toplamaa, miting yapmaa, bizä masovka diil lääzım. Bizä lääzım iş olsun, o neetlär hem davaalar, angıları durêr cümnä topluluunun önündä, onnar tamannansın. Da şükür Allaha, yavaş-yavaş bunnar tamannanêr.

» Читать далее

1 24 25 26