Elena Mokanu: Binnän yıl halk yaşasın

OYUNNAR

Oyunnar, şu oyunnar!

Pırıldak gibi dönӓr

Gözӓl horuda kızlar,

Levent boylu olannar.

Yaşlı yaşı unudêr,

Türkü kanı kaynadêr!

Toplanêrız kol-kola,

Ayak oynêêr bol-bola.

Kimin biyaz basması,

Düşsün bu gün sevdası.

Kimin beli acımış,

Belini da unutmuş.

Oyunnar, şu oyunnar!

Güvӓä gelini tutar,

Kimsey onu kapmasın,

Parasız da brakmasın.

Mancalar suudu çoktan,

Eni geler fırından,

Çölmektӓ tatlı ikram,

Taazeli tam fıçıdan.

Oyunnar, şu oyunnar!

Koyu-maavi fistannar,

Gözӓl horuda kızlar,

Levent boylu olannar!

Binnӓn yıl halk yaşasın,

Horuyu unutmasın!

 

BİZİ ALLAH KORUSUN

Ko oolum olsun saalıklı,

Adamım kötü gözdӓn saklı,

Ko anam-bobam sevinsin,

Ani var ayleciim ne isin,

Ne isin, ne giisin, ne düzsün!

Ko ceviz fidanı da büüsün

Kırnacık tokadın boyunda.

Olalım Allahın koynusunda!

Ko halkım yaşasın birliktӓ,

Birliktӓ yaşasın, iiliktӓ!

Ko kırlar hem baalar olsun hoş,

Ani durmêêrlar bir dä yıl boş.

Güneşçik her sabaa ko duusun!

Ko Allah bizi korusun!

Elena MOKANU

Добавить комментарий