Gagauziyada eni yazıcılar birlii kuruldu

Kirez ayının 19-da Komratta Atatürk adına türk bibliotekasında eni Gagauz yazıcılar birlii tanıdıldı. Eski birlik çok yıl oldu işlämeer, bu üzdän aaraştırmacı hem yazıcı Konstantin Kurdoglu teklif etti enidän kurmaa bir birlik, angısı taa aktiv işleyecek hem yardım edecek yazıcılara tiparlamaa kendi yaratmalarını.

Eni birlää girdi birkaç peetçi hem yazıcı, angılarının arasında var Todur Marinoglu, Elena Mokanu, Alla Büük, Galina Sirkeli hem Alöna Ergoglu. Kurucular teklif ederlär yazıcıları hem peetçileri, kimin var tiparlanmış yaratmaları girmää birlää, angısı yardımcı olacek onnara her uurda.

Konstantin Kurdoglu yazdı, ani makarki onnar kuvetleri dä teklif etmişlär bu toplantıya, ama üüsek zaabitlerdän kimsey gelmemiş. Genä dä azalar umut ederlär, ani işleyeceklär hepsi kuvetlärlän hem cümnä topluluklarlan barabar gagauz literaturasının ilerlemesi için.

Foto: K. Kurdoglu