«Hakikatçıların sesi» yaratma toplumu tanıdıldı

Canavar ayının 17-dä Komratta Atatürk bibliotekasında «Hakikatçıların sesi» yaratma toplumu tanıdıldı. Topluma girdi 13 kişinin yaratmaları, angıları tiparlandı «Hakikatın sesi» gazetasının 1-34 nomerlerindä. Toplumu açêr hazırlayan Viktor Kopuşçunun önsözü, ondan sora geler ayoz Altınaazlı İoanın Paskellä sözü, angısı okunêr her Paskellä liturgiyasında. Çeviri yapıldı 2008-ci yılda, anılmış türkolog Lüdmila Pokrovskaya çeviriyi pek beendiydi.

Gagauz yazıcılarından topluma girdi hem çoktan yazannarın, hem genç yazıcıların yaratmaları. Kimileri artık yok bizim aramızda, ama onnarın kıymetli materialları seftä yayınnandı: Nikolay Baboglunun el yazması hem Stepan Kuroglunun anasına kiyadı — arhiv dokumentleri, onnarı yayına hazırladı Petri Çebotar.

Petri Çebotarın yazdıı «Açıklamalı söleyişlär» dä pek kıymetli. İlk denemä olarak, kiyada girdi 60-tan zeedä söleyiş (sade A bukvası), ama avtor ötää dooru götürer bu işi — açık bir dillän, yaşamaktan istoriyalarlan açıklêêr gagauz söleyişlerinin maanalarını.

Gagauz literaturasında eni bir literatura topluluu peydalandı — o kişilär, kim toplandı «Hakikatın sesi» gazetasının dolayında. Onnar yazêr hem peet, hem annatma, hem publiţistika yazıları.

Foto: copceac-pobeda.com, Alla Büük.