Hristos dirildi — dünneyä kurtuluş!

Hristos dirildi ‒ dünneyä kurtuluş,

Peetlär dizeräk, bän çalêrım kauş.

 

İşidin benim türkümü, kardaşlar,

Kahır tükensin hem bitsin ko yaşlar.

 

Şannayın Allah Oolunu ‒ İisusu,

Bizä açıldı cennetin kapusu.

 

Kendi-kendini getirdi O kurban,

Allahlan bilä ki olsun hep insan.

 

Cendem boşaldı, yıkıldı temeldän,

Taman olundu yazılan eveldän.

 

Cendem uluyêr ‒ üfkeli canavar,

Beklämedii saat inini bozdular.

 

Ölüm dä artık gücünü kaybetti,

Allahlan eni annaşma çeketti.

 

Sevinin hem çalın Ona türkülär,

Ona adanmış bu hava hem peetlär.

 

Gördük Hristosun göklerä yolunu,

Kauş çalarak, metinneeriz Onu.

 

Viktor Kopuşçu