Kilimnär

Gecenin maavi kadifesi,
Pençeredä — ay hem yıldızlar,
Sade lüzgerin kaba sesi —
Eski türkülär hem masallar…

Evelki adetlerä görä
Düzendä genç kız kilim dokuyêr,
İpleri yapaa ömürlerä
Gercik resimlärlän döküler.

Geceyä diişer kısa günnär,
El işi baaşlêêrlar saatları,
Karannık oda, sade mumnar
Hayırlı duurdêrlar şafkları.

Bir kilim — o ayırı dünää,
Herbir çizgicik — ürek işi,
Çalışêr durgunmasız iilää
Kız cömert kısmetinä karşı.

Yaşamak aacı — dolayında,
Bütün dünneyä baalantılar,
Silinmäz topraan akılından
Kilimdä izlär hem nasaatlar.

Te üzerlär kügülär suda…
Bim-biyaz kuşlar — maaviliktä,
Bu paklık açık sarp umuda,
İyi kısmet olur inanmakta.

Güllerdä — kızın gözäl üzü,
Kalbi oynadêr açmış sevda,
Donaklêêr kız düününä çiizi
Kırmızı-pembä benizlerdä.

İplerin sonsuz dan yolları,
Binnän düümüklär, ah, dayanmak,
Ustacı elda korafları,
İncä zanaatta o bir yanmak.

Halkımın üüsek yaratması!
Arif fikir’ni silmäz vakıt.
Allahtan minunya dalgası,
Güneşli avalar’nı akıt…

Anamın ihlam kilimneri,
Siz ruha verersiniz saalık,
Şükürlü diiyer sizä elim,
Ki cana baaşlêêrsınız raatlık.

Valentina BUJİLOVA

Добавить комментарий