Papa hem patriarh Kiril buluştu

Küçük ayın 12 Gavana aeroportunda (Kuba) Moskva patriarhı Kiril hem Rim klisesinin öndercisi papa Franţisk buluştular. Bu buluşma 20 yıl hazırlandı.

“Beni brakmêêr o duygu, ani biz dooru vakıtta hem dooru erdä buluşêrız”, — dedi patriarh.

Taraflar yaklaşık iki saat kapalı kapuların ardında lafettilär, nedän sora imzaladılar ortak bir deklaraţiya. Bu dokumenttä yok bir dä teologiya soruşu, sade dünnedä olan oluşlara baalı tekliflär.

Buna bakmayarak, Rusiyada hem başka erlerdä klisä insannarı arasında yayıldı ideya, ani patriarh isteer birleşmää katoliklärlän. Bunu ret etti patriarhiyanın zaametçileri hem komentatorlar.

Moldovada da bu buluşmaya karşı çıktılar. 2 manastır hem yaklaşık 10 popaz açıkladı, ani slujbalarda anmayaceklar kendi arhiereyini, çünkü onnar karşı butürlü ekumenizma işlerinä. Onnar istedilär arhiereylär geeri alsınnar imzalarını Arhierey topluşundan, angısı Moskvada geçti küçük ayın başında, haberleer «Hakikatın sesi» gazetası.

Добавить комментарий