Paskellä vakıdı

İlkyaz lüzgerinnän yortular geldi,

Üüremizä sevinmäk  genä getirdi,

Türlü benizdä açêrlar fasıl zümbüllär,

Kär ateş gibi yanêrlar erken laalelär.

 

Fidannar biyaz bulutlan sardı dolayı,

Enidän  duygu başlêêr hoş çiçek ayı.

Çiçeklärlän kaarışık paska kokusu,

Hristiannarın en büük ilkyaz yortusu.

Kuşlar düzmeerlär yuva uygun havada,

Cıvırdêrlar, sevinip, çiçeklı dalda.

Kırlangaçlar keskin seslän bütün gün öter,

Blaguşten’için bizä haber getirer.

 

Süüt dallardan pazara klisä açacek,

Vereräk umut, saalık, üreenä raatlık.

Büük Paskellä yaklaşêr, ayozlu Pazar,

Sansın taa pek diriler klisedä çannar.

 

Karışêr hayır duygulan fasıl kokular,

Dualar gökä çıkêrlar, türkü oldular.

Yerlän gök bu şen türküylän bireri geldi,

Hererdän işidiler: Hristos dirildi!

 

Aleksandra KRİSTOVA

«Hakikatın sesi» gazetası, 2016, № 4 (18), s. 4.

 

Добавить комментарий