Sevecäm diveç

Sevecäm seni diveç,

Sevecäm heptän,

Sade demä, ani geç

Ayırmaa kalptän

O sevdiin biyaz atlı

Karagöz prinţi.

Brak onu, senin tatlı

Düşündä kalsın.

Gelecäm sana gecä

Bir ürük atta,

Sän sä genä deyecän:

“Brak beni raada!

Sän benzämeersin ona,

Kimi sevdim pek.

Hem baksana atına,

O, allem, eşek!

Düşümä gelän – soylu,

Balaban, iiri,

Sän sä alçacık boylu,

Sansın poptiri*!”

Dönecäm ozman geeri,

Eni Don Kihot.

Deyeceklär: “Canabi,

Sanki, idi ot!”

Garip Simanın oldum

Bän Kahramanı,

Korumaa da koyuldum

Senin adını.

Gezecäm adım-adım

Bütün dünneyi,

Bilsinnär: bän ayırdım

Dulsineyayı.

Eer istärsän vazgeçmää,

Sän bendän vazgeç,

Bän sä bıkmaycam sevmää,

Sevecäm diveç!

Viktor Kopuşçu, 2012

_____

poptiri – cücä